विषय हार्ड न्युज,अहमदाबाद १२ जून २०२५ : अहमदाबादहून लंडनच्या गॅटविक विमानतळाकडे जाणारी एअर इंडिया फ्लाइट AI171 आज सकाळी उड्डाण घेतल्यानंतर काही सेकंदांतच अपघातग्रस्त झाली. या दुर्घटनेने देशभरात खळबळ उडाली असून, एकूण २४२ प्रवाशांचे जीव धोक्यात आले आहेत.या बोईंग 787-8 ड्रीमलायनर प्रकारच्या विमानाचा शेवटचा सिग्नल 08:08:51 UTC या वेळेस प्राप्त झाला. त्यानंतर फ्लाइट ट्रॅकिंग प्लॅटफॉर्म Flightradar24 वरून त्याचा संपर्क तुटला. अपघातस्थळ विमानतळाच्या परिसरातच असल्याचे प्राथमिक माहितीमधून समजते.या विमानात २ वैमानिक, १० केबिन क्रू आणि २३० प्रवासी होते. या उड्डाणाचे संचालन कमांडर कॅप्टन सुमीत सभरवाल आणि फर्स्ट ऑफिसर क्लाईव्ह कुंदर करीत होते.एअर इंडियाने या घटनेची तातडीने पुष्टी केली असून, “घटनेचा सविस्तर तपास सुरू आहे. संबंधित प्रवाशांच्या कुटुंबीयांशी संपर्क साधण्याचे काम सुरु आहे,” असे अधिकृत निवेदनात म्हटले आहे. अधिक माहिती airindia.com आणि @airindia (X हँडल) वरून दिली जात आहे.दरम्यान, DGCA (डायरेक्टोरेट जनरल ऑफ सिव्हिल एव्हिएशन) ने देखील दुर्घटनेची नोंद घेतली असून तांत्रिक व वैमानिक कारणांचा तपास सुरू करण्यात आला आहे.या अपघातामुळे देशभरातून शोक व्यक्त केला जात आहे. अनेक निष्पाप जिवांचे भविष्य एका क्षणातच संपुष्टात आले. या दुर्घटनेतील प्रवाशांच्या सुरक्षिततेसाठी संपूर्ण देश प्रार्थना करत आहे.
