विषय हार्ड न्युज,पुणे : शहरातील सर्वाधिक वर्दळीच्या ठिकाणांपैकी एक असलेल्या पुणे रेल्वे स्थानक परिसरात भटक्या कुत्र्यांचा वावर मोठ्या प्रमाणात वाढल्याचे चित्र समोर येत आहे. विशेषतः रात्रीच्या वेळी प्लॅटफॉर्म तसेच स्थानकाबाहेरील परिसरात कुत्र्यांचे टोळके मुक्तपणे फिरताना दिसत असल्याने प्रवाशांमध्ये भीतीचे वातावरण पसरले आहे.
लहान मुले, ज्येष्ठ नागरिक आणि महिला प्रवाशांच्या सुरक्षेच्या दृष्टीने ही परिस्थिती चिंताजनक मानली जात आहे. अचानक हल्ला किंवा चावण्याच्या घटनांची शक्यता नाकारता येत नसल्याने संभाव्य अपघाताचा धोका देखील वाढला आहे.
दररोज हजारो प्रवाशांची ये-जा असलेल्या या महत्त्वाच्या स्थानकावर सुरक्षेबाबत प्रश्न उपस्थित होत असून संबंधित प्रशासनाने तातडीने दखल घेऊन ठोस उपाययोजना कराव्यात, अशी जोरदार मागणी प्रवासी वर्गातून होत आहे.
कुत्री चावल्यामुळे रेबीजमुळे नुकताच एका तरुणाचा जीव गेला, ही घटना ताजी असतानाच, पुणे विमानतळासह पुणे रेल्वे स्थानकावर देखील भटक्या कुत्र्यांचा वावर वाढला आहे. याकडे स्थानिक सुरक्षा एजन्सीसह पुणे महानगर पालिकेचेही दुर्लक्ष होत असल्याचेही समोर आले आहे.
