दारूच्या धुंदीत कपडे फेकले, महिलांशी अर्वाच्य वर्तन, वॉचमनला मारहाण; सिंहगड पोलिसांची दमदार कारवाई!
विषय हार्ड न्युज,पुणे (प्रतिनिधी) –
सिंहगड रस्ता परिसरातील माणिकबाग येथे शुक्रवारी सायंकाळी दोन तरुणांनी दारूच्या धुंदीत रस्त्यावर अक्षरशः धिंगाणा घातल्याने परिसरात भीतीचे वातावरण पसरले. दुकानासमोरच कपडे काढत विकृत प्रकार केले, महिलांशी अर्वाच्य वर्तन करत दुकानदाराला शिवीगाळ करत घेतलेल्या वस्तूंचे पैसेही न देता आरडाओरडा सुरू केला.
ही दोन्ही तरुण मंडळी इतकी बेशिस्त झाली होती की, त्यांनी त्यांच्या चारचाकी वाहनाला थेट नो-पार्किंग झोनमध्ये दोन गाड्यांच्या मध्ये उभी करून वाहतूक कोंडीही निर्माण केली. जवळपास एक तास हा तमाशा सुरू होता, त्यामुळे संपूर्ण माणिकबाग परिसरात नागरिकांमध्ये भीतीचे आणि संतापाचे वातावरण निर्माण झाले होते.
यावेळी सोसायटीच्या वॉचमनला देखील मारहाण करत त्यांनी गेटवरच सार्वजनिक ठिकाणी लघुशंका केली. स्थानिक दुकानदार व नागरिकांनी प्रसंगाचे गांभीर्य लक्षात घेऊन तत्काळ पोलिसांना कॉल केला. सिंहगड पोलीस ठाण्याचे कर्मचारी व अधिकारी घटनास्थळी दाखल होताच, तरुणांनी पोलिसांशीही उद्धटपणे वागण्याचा प्रयत्न केला आणि व्हिडिओ काढण्याची धमकी दिली.
मात्र पोलिसांनी दक्षता दाखवत दोन्ही तरुणांना ताब्यात घेतले आणि पोलीस ठाण्यात हलवले. सदर तरुणांनी घेतलेल्या कपड्याचे पैसेही दिले नसल्याने दुकानदारांनी तक्रार दाखल करणार आहे
सध्या पुढील तपास सिंहगड पोलीस करत आहेत.
या प्रकरणामुळे काही काळासाठी माणिकबाग परिसरात खळबळ उडाली होती. रस्त्यावर वाहतूक कोंडी वाढल्याने नागरिकांना मोठ्या त्रासाला सामोरे जावे लागले. स्थानिक नागरिकांमध्ये संतापाचे वातावरण असून अशा घटनांवर कडक कारवाईची मागणी होत आहे.
