महिला दिन म्हणजे केवळ उत्सव नाही; तो आत्मपरीक्षणाचा आणि समाज घडविण्याचा दिवस आहे.
Pune :संपूर्ण जगात महिला दिन मोठ्या उत्साहात साजरा केला जातो. स्त्रियांच्या अधिकारांबद्दल, स्वातंत्र्याबद्दल आणि सन्मानाबद्दल चर्चा होते. परंतु या दिवसाचा खरा अर्थ समजून घेतला तर तो केवळ अधिकारांचा नाही, तर जबाबदारीचाही दिवस आहे. समाज, कुटुंब आणि पुढील पिढी घडविण्यात स्त्रीची भूमिका अत्यंत महत्त्वाची आहे. त्यामुळे महिलांनी स्वतःच्या सामर्थ्याचा योग्य वापर करणे आवश्यक आहे.आज अनेक घरांमध्ये असे दिसते की, काही वेळा घरातील तणाव, गैरसमज आणि वाद यामागे स्त्री-पुरुष दोघांचीही भूमिका असते. मात्र काही प्रसंगी महिलांच्या वागणुकीमुळे पतीला मानसिक ताण, अपमान किंवा सामाजिक अडचणींचा सामना करावा लागतो. ही बाब देखील प्रामाणिकपणे मान्य करणे गरजेचे आहे. कारण सुदृढ कुटुंब ही समाजाची मूलभूत इकाई आहे आणि ती टिकविण्यासाठी दोन्ही बाजूंनी संयम व समजूत आवश्यक आहे.स्त्री ही घराची संस्कारकर्ती असते. तिच्या बोलण्यातून, वागण्यातून आणि निर्णयातून संपूर्ण घराचे वातावरण ठरते. जर स्त्री संयमी, समजूतदार आणि सकारात्मक विचारांची असेल तर घरात आनंद आणि स्थैर्य निर्माण होते. परंतु जर अहंकार, संशय किंवा अनावश्यक वाद निर्माण झाले तर त्याचा सर्वाधिक परिणाम कुटुंबावर आणि विशेषतः मुलांवर होतो.महिला दिनानिमित्त प्रत्येक स्त्रीने काही गोष्टींचा गंभीरपणे विचार करणे आवश्यक आहे.महिलांनी काय केले पाहिजे :१. कुटुंबात संवाद, विश्वास आणि आदराचे वातावरण निर्माण करणे.२. पती-पत्नी दोघेही एकमेकांच्या भावना आणि संघर्ष समजून घेण्याचा प्रयत्न करणे.३. मुलांना चांगले संस्कार, शिक्षण आणि समाजाबद्दलची जबाबदारी शिकविणे.४. स्वावलंबन आणि आत्मसन्मान राखताना कुटुंबातील एकात्मता जपणे.५. समाजातील दुर्बल घटकांसाठी सामाजिक कार्य, शिक्षण, आरोग्य आणि जनजागृतीमध्ये योगदान देणे.महिलांनी काय टाळले पाहिजे :१. अनावश्यक संशय, सततचा वाद किंवा अपमानास्पद बोलणे.२. कुटुंबातील छोट्या मतभेदांना मोठा संघर्ष बनविणे.३. सोशल मीडिया किंवा बाहेरील प्रभावामुळे घरातील नातेसंबंध दुर्लक्षित करणे.४. मुलांसमोर पती-पत्नीचे वाद वाढवणे.५. स्वतःच्या रागामुळे किंवा अहंकारामुळे घरातील शांतता भंग करणे.आजच्या काळात स्त्रिया प्रत्येक क्षेत्रात मोठे यश मिळवत आहेत—राजकारण, शिक्षण, प्रशासन, उद्योग, कला आणि सामाजिक कार्य. हे नक्कीच अभिमानास्पद आहे. परंतु या यशासोबत कुटुंब व्यवस्थेची जपणूक देखील तितकीच महत्त्वाची आहे.महिला दिनाचा खरा संदेश असा आहे की, स्त्री ही केवळ अधिकारांची मागणी करणारी व्यक्ती नसून समाज घडविणारी शक्ती आहे. तिच्या हातात प्रेम, संयम आणि मूल्यांचा दीप असतो. त्या दीपामुळेच घर उजळते आणि समाज प्रकाशमान होतो.म्हणूनच महिला दिन हा फक्त साजरा करण्याचा दिवस नसून स्वतःकडे पाहण्याचा, चांगल्या गोष्टी स्वीकारण्याचा आणि चुकीच्या गोष्टी दुरुस्त करण्याचा दिवस आहे. स्त्री-पुरुष दोघांनीही एकमेकांना समजून घेत, आदराने आणि प्रेमाने आयुष्य जगले तरच कुटुंब मजबूत राहील आणि समाज अधिक सुदृढ बनेल.– सुवर्णा पवार/शहा
