विषय हार्ड न्युज,सिंहगड – अधिकृत उमेदवार रुपाली रमेश कोंडे यांच्या रॅलीने परिसर दणाणला.सिंहगड परिसरात शिवसेना (शिंदे गट) च्या वतीने आयोजित करण्यात आलेल्या भव्य रॅलीत हजारो शिवसैनिक रस्त्यावर उतरल्याने संपूर्ण परिसर दुमदुमून गेला. शिवसेनेच्या अधिकृत उमेदवार रुपाली रमेश कोंडे यांच्या समर्थनार्थ काढण्यात आलेल्या या रॅलीत “जय शिवाजी, जय भवानी” आणि “शिवसेना जिंदाबाद” च्या घोषणांनी वातावरण भारावून गेले.
हातात भगवे झेंडे, डोक्यावर भगवी टोपी, ढोल-ताशांचा निनाद आणि शिवसैनिकांचा उत्स्फूर्त जल्लोष यामुळे ही रॅली लक्षवेधी ठरली. सिंहगड परिसरातील प्रमुख मार्गांवरून रॅली मार्गस्थ होत असताना नागरिकांनीही मोठ्या प्रमाणावर उपस्थिती लावून पाठिंबा दर्शवला.
या रॅलीमुळे रुपाली रमेश कोंडे यांची उमेदवारी अधिक भक्कम होत असल्याचे चित्र स्पष्ट झाले आहे. विशेषतः रमेश बाप्पू कोंडे यांच्या नेतृत्वावर असलेला कार्यकर्त्यांचा विश्वास या शक्तीप्रदर्शनातून ठळकपणे दिसून आला.
रमेश बाप्पू कोंडे यांचा ठाम शब्दांत निर्धार
रॅलीदरम्यान उपस्थितांना संबोधित करताना रमेश बाप्पू कोंडे म्हणाले,
“सिंहगड परिसरातील जनतेने आणि शिवसैनिकांनी आज दाखवलेले प्रेम आणि विश्वास हीच आमची खरी ताकद आहे. मुख्यमंत्री एकनाथ शिंदे साहेबांच्या नेतृत्वाखाली शिवसेना सर्वसामान्यांच्या प्रश्नांसाठी लढत आहे. रुपाली कोंडे यांच्या विजयासाठी प्रत्येक शिवसैनिक शेवटच्या क्षणापर्यंत झटणार असून, हा विजय निश्चित आहे.”
ते पुढे म्हणाले की, सिंहगड परिसराचा सर्वांगीण विकास, पायाभूत सुविधा, पाणी, रस्ते, युवकांचे प्रश्न आणि महिलांचे सक्षमीकरण हेच आमचे प्रमुख ध्येय आहे.
या शक्तीप्रदर्शनामुळे सिंहगड परिसरातील राजकीय वातावरण तापले असून, आगामी निवडणूक चुरशीची होणार असल्याचे संकेत मिळत आहेत.
